DAVAO CITY – Hitsas na ang pagpangandam sa ahensiya sa Department of Education (Deped)-11 alang sa limited face to face classes sa Nobyembre 15, 2021 diin anaa sa walo ka mga tulonghaan sa Davao region ang kalakip niini.
Tungod niini, gipahugtan pa sa Deped-11 ang ilang panawagan sa mga teaching ug non-teaching personnel nga mopailalom na sa pagbakuna.
Laraw sumala pa niini nga mamahimong luwas ang mga mosalmut sa face to face classes ingon man ang mga tinun-an nga kalakip niini.
Una ng nasayran sa ahensiya nga dinhi sa Davao region, tulo ka mga tulonghaan sa Davao del Sur ug anaa sab sa lima ang sa Davao del Oro ang kalakip sa Face to face classes.
Sa kasamtangan, anaa na matud pa sa 10,667 ang nakadawat ug 1st dose sa mga household member sa Deped samtang 8,481 usab ang 2nd dose.
Kahinumduman nga una ng gibutyag sa Deped-11 nga aduna pa gihapoy mga magtutudlo nga wala nakapabakuna kini tungod sa tinuohan o relihiyon.
Nagpadayag sab ug kabalaka ang pipila ka mga ginikanan sa mga estudyante apan gipasalig sa ahensiya nga ipatuman nila ang minimum health standard samtang anaa sa mga tulonghaan.
