DAVAO CITY – Nagpadayag sa ilang kabalaka ang Davao City Ancillary Service Unit (ASU) kalabot sa ulahing nakolekta sa ilang mga staff nga mga syringes atol sa ilang gipahigayon nga coastal cleanup sa September 2021.
Sumala pa kang ASU chief Paul Bermejo, una ng gipahigayon ang coastal cleanup sa Sitio Pogi, Barangay Daliao in Toril District sa milabay ng bulan isip pagsaulog sa International Coastal Cleanup Day.
Gisalmutan kini sa mga personahe sa City Government inabagan sa mga barangay leaders, nagkadaiyang associations, grupo ug mga indibidwal kinsa nanglimpiyo daplin sa kadagatan ug kasapaan.
Usa sumala pa sa ilang mga volunteers ang nakakolekta ug tulo ka litro sa PET bottle nga puno ug syringes. Kalakip sab sa ilang nakolekta ang medium-sized plastic bag nga gi-undan sab ug syringes.
Nagtoo si Bermejo nga ang nahisgutan nga mga syringes ang gikan sa Covid-19 vaccination bisan pa man nga adunay standard protocol partikular na sa pag-dispose sa medical wastes ilabi na kadtong gikan sa Covid-19 hospitals ug isolation facilities.
Dismayado sab ang ahensiya gumikan kay gawas sa nakolekta nga mga face masks ug face shields sa kasapaan sa siyudad, aduna sab sumala pay mga medical wastes nga nahipus nga mamahimong makapabutang sa risgo sa panglawas.
Una na sab nga gibutyag ni Covid-19 Task Force Spokesperson Dr. Michelle Schlosser nga wala pay mi-reklamo sa ilang buhatan apan gipasalig niini sa publiko nga ila kining hisgutan sa ipahigayon nga Task Force meeting.
