DAVAO CITY – Anaa na karon sa otoridad ang sakop sa abu Sayyaf nga gitudlong mipaluyo sa nahitabong pagpangidnap sa Samal Island ug pagpatay sa ilang duruha ka mga bihag pipila ka tuig na ang milabay.
Nasikop ang suspek nga nailang si Adzrimar Sali Ammat o mas naila nga si alyas “Adz”, “Abu Omar” ug “Guru Adin”, 30 anyos, lumad nga taga Tabu Batu, Maimbung lungsod sa Sulu.
Nadakpan ang mga nahisgutan sa Joint operatives gikan sa police Anti-Kidnapping Group (AKG) Mindanao Field Unit (MFU), 2nd Mobile Force Company, mga tropa sa Marine Battalion Landing Team-11 (MBLT) ug intelligence units sa Campo Islam sa nahisgutan nga siyudad.
Sumala pa kang Brig. Gen. Ronald Genaro Ylagan, Police Regional Office 9 (PRO) director, aduna sumala pay standing warrant of arrest si Ammat tungod sa kasong kidnapping with homicide nga gi-isyu sa Regional Trial Court 11 (RTC) Judicial Region sa Panabo City, Davao del Sur kaniadtong Setyembre 29, 2016.
Aduna sab sumala pa kini lain nga warrant of arrest tungod sa duruha ka ihap sa kasong kidnapping with ransom nga gi-isyu sa RTC 9, Judicial Region, Bongao, Tawi-Tawi sa milabay nga Setyembre 2, 2019.
Kahinumduman nga gi-atake sa mga armadong Abu Sayyaf ang usa ka resort sa Samal Island kaniadtong Setyembre 21, 2021 ug gibihag ang mga langyaw nga nailang sila si Norwegian resort manager Kjartan Sekkinstad, 56; Canadian guests John Ridsdel, 68 anyos ug Robert Hall, 50 anyos; ug Filipina nga si Marites Flor.
Gidala ang mga biktima sa Sulu apan duruha ka Canadians ang gipatay human nga wala nakabayad ug ransom samtang nakagawas sila si Flor ug Sekkingstad.
Ang nasikop nga suspek ang anaa karon sa kustodiya sa AKG-MFU alang sa tukma nga disposisyon.
