DAVAO CITY – Subling nagpahibalo ang Island Garden City of Samal LGU ngadto sa publiko nga sugod sunod Huwebes, Oktubre 28, temporaryong sirad-an ang mga public ug private nga minteryo sa tibuok Dakbayan.
Mulungtad kini og usa ka semana, ug mahuman kini sa Nobyembre 3, Miyerkules.
Busa, nagaawhag sila ngadto sa mga mubisita sa ilang mga mitaliwan nang mga minahal sa kinabuhi nga pagahimuon na ang ilang pagduaw sa wala pa miabot ang petsa sa pagpasirado niini.
Apan, giklaro usab sa Samal LGU nga tugutan gihapon ang mga lubong sa susamang mga petsa, ug bugtong mga miyembro lang sa pamilya ang tugutan nga mutambong.
Pahugtan usab ang seguridad sa mga minteryo, columbaria, ug memorial parks sa Dakbayan aron mapatuman gihapon ang health protocols sa nasangpit nga mga dapit.
Bisan pa man nga nagagamay ang kaso sa COVID-19 sa Davao Region, pagabuhaton gihapon kini aron malikayan ang kalit nga pagsaka sa mga kaso, ilabi na nga matag panahon sa Kalag-Kalag, magtapok ang mga tawo.
