DAVAO CITY – Tulo ka mga barangay ang giila isip Critical Risk Barangays, subay sa ulahing Barangay Risk Classification Assessment sa Davao City LGU.
Gilangkuban kini sa Barangays 26-C, 30-C, ug 40-D.
Samtang, ana sa 19 ka mga Barangay ang High Risk sama sa 5-A , 14-B, 17-B, 37-D, 38-D, Angalan, Bato (Toril), Biao Escuela, Centro (San Juan, Agdao), Crossing Bayabas, Gumalang, Los Amigos, Malabog, New Valencia, Pangyan, Sto. Niño (Tugbok), Tamugan, Ubalde ug Waan.
Anaa sa 93 ka mga barangay ang Moderate Risk ug 47 ka mga barangay ang anaa sa Low and Minimal Risk Classification. Mulungtad hangtod Oktubre 5 ang mga nahisgutang Barangay Classifications.
Nagpahimangno usab ang Davao City LGU ngadto sa katawhan nga dili muadto sa mga Critical ug High Risk Barangays, gawas na lamang kung adunay mahinungdanong mga katuyuan sama sa trabaho, negosyo, ug emerhensiya.
Sa pikas bahin, gibutyag kaniadto sa lokal nga panggamhanan nga pakusgan pa niini ang mobile vaccination program sa mga critical ug high risk barangays, ilabi na sa mga hilit nga barangay sa Dakbayan, aron mahatagan og proteksyon batok COVID-19 ang mga nanimuyo sa nahisgutang mga dapit.
