DAVAO CITY – Gibutyag ni Davao City Mayor Inday Sara Duterte Carpio nga ang household transmissions sa COVID-19 ang kadaghanan karon sa mga kaso sa COVID-19 sa Dakbayan.
Mao usab kini ang una nang gikanayon sa tigpamaba sa Davao City COVID-19 Task Force nga si Dr. Michelle Schlosser, ug kini ang nahimong hinungdan sa pagpatuman og household lockdowns sa Dakbayan.
Busa, gisugyot na sa Alkalde ang pagsul-ob og face mask bisan anaa sa sulod sa panimalay sanglit kini ang makapugong sa pagkatap sa virus sulod sa balay sanglit usa sab kini ka enclosed space.
Sa pikas bahin, nagpahimangno usab si Duterte-Carpio sa katawhan nga kung mamahimo, magpabakuna na o di kaha likayan usa ang mga dili mahinungdanong mga lakaw karong anaa sa GCQ with Heightened Restrictions ang Dakbayan .
Nagpahimangno usab siya nga dili na mamili og brand sa COVID-19 vaccine gumikan kay duna gihapon mga kaso sa mga natapdan og COVID-19 nga fully-vaccinated na gamit ang mga brand sa bakuna nga ginagamit karon sa Dakbayan alang sa vaccination program niini
