DAVAOP CITY – Gibutyag sa usa ka opisyal sa Department of Agriculture XI nga mikabat na matud pa sa 49,315 ka mga baboy ang gipailalom sa culling sa Davao region sukad nga nagsugod ang outbreak sa African Swine Fever (ASF) sa rehiyon duruha ka tuig na ang nakalabay.
Una ng gibutyag ni Dr. Karl Laurence Pineda, Livestock Coordinator sa Department of Agriculture XI nga ang nahisgutan nga pandemiya nga mihatud ug dakong epekto sa swine industry ang nakaapekto sa 10,664 ka mga mag-uuma sa 237 ka mga barangay sa 43 ka mga munisipalidad sa lima ka mga probinsiya ug usa ka siyudad sa rehiyon.
Sa nahisgutan nga ihap, 5,669 ang natalang naapektohan sa Davao Occidental, 1,138 sa Davao de Sur, 1,259 sa Davao City, 1,068 sa Davao del Norte, 106 sa Davao de Oro ug 1,424 farmers sa Davao Oriental.
Gitataw sab ni Pineda nga sa Mati, Davao Oriental usa ka gamay nga farm laboratory ang nagkumpirma nga adunay natalang ASF sa milabay nga Agosto 13, 2021 apan wala sumala pay gipahigayon nga culling sa tanan nga mga baboy.
Nakapahigayon na sab karon ang lokal nga kagamhanan sa Mati ug total disinfection sa mga apektadong lugar ug nagpadayon ang gihimong survey sa mga silingan nga barangay niini.
Susama sab sumala pa ang gihimong lakang karon sa probinsiya sa Davao de Oro, Davao del Norte, Davao City, Davao del Sur ug Davao Occidental.
Nagpahigayon na sab karon ang Department of Agriculture Davao Region ug training sa mga apektadong komunidad aron nga mamahimong barangay biosecurity officers.
Mikabat sumala pa sa P172, 535,000. 00 ang napagula nga kantidad sa DA XI nga alang sa mga apektadong mag-uuma sa Davao region.
