DAVAO CITY – Pipila ka adlaw ayha matapos ang gipatuman nga closed fishing season sa Davao Gulf, nakahimo pa pagsikop ang mga personahe sa bureau of Fisheries and Aquatic Resources (BFAR)-11 ug tulo ka mga mananagat kinsa migamit ug mga isdang panagat nga hugtanon una nga ginadili samtang mipatigbabaw ang maong kamandoan.
Sumala pa kang BFAR-11 Regional Director Raul Millana, sa tulo ka mga nadakpan duruha niini ang gikan sa Mayo Bay sa Davao Oriental samtang ang usa ang taga-Samal Island.
Sagad sumala pa sa mga nahisgutan ang nakasupak sa Republic Act 10654 o Philippine Fisheries code of 1998.
Sumala sa opisyal nga halos matag semana sila nga makasikop ug mga masinupakon nga mga mananagat hinungdan nga hugtanon ang ilang gipahigayon nga monitoring sa Davao Gulf hangtud nga matapos ang closed fishing season sa Setyembre 1.
Kahinumduman nga gipatuman ang maong lakang kini aron nga mahatagan ug kahigayonan ang mga isda nga makapangitlog ug makapanaghan hinungdan nga hugtanon nga ginadili ang paggamit ug nigpis nga mga pukot kini aron nga dili malakip pagkuha ang mga gagmay nga mga isda.
Mapasalamaton sab ang BFAR-11 sa mga katawhan nga makig-alayon gilayon sa ilang buhatan sa higayon nga adunay mamatikdan nga masinupakon sa gipagula nga kamandoan.
Gitataw ni Millana, nga dili magmalampuson ang nahisgutan nga lakang kung walay igong suporta gikan usab sa mga stakeholder.
Gisugdan ang pagpatuman sa Closed fishing season kaniadtong milabay nga bulan sa Hunyo ning kasamtangan nga tuig.
