DAVAO CITY – Nakabsan sa kinabuhi si Elvie Villanel, 38 anyos, lady guard sa Assumption College of Davao, human kini gidunggab sa iyang kapuyo nga welder nga si Romeo Nepomuceno, 41 anyos, niadtong Sabado sayo sa kabuntagon sa may Dumanlas sa Buhangin ning Dakbayan sa Davao.
Sa pakighinabi sa Bombo Radyo Davao ngadto sa Chief of Police sa Buhangin Police Station nga si Police Major Bernie Suaga, alas 11 sa gabii niadtong adlawng Biyernes, Agosto 6, nagsugod ang away sa magkapuyo tungod sa selos.
Human sa pagpanunggab ni Nepomuceno kang Villanel, iya usab nga gigulgol ang kaugalingong liog niini.
Wala pa nakabsan sa iyang kinabuhi ang suspek, gani nakapangayo pa kini og tabang sa iyang mga silingan ug miangkon pa sa iyang nabuhat nga kasaypanan, butang nga gipamatud-an mismo sa mga nakasaksi niini.
Gidala pa sa Southern Philippines Medical Center ang suspek aron tambalan, apan namatay na kini niadtong Dominggo, Agosto 8, 2021.
Narekober sa crime scene ang usa ka kitchen knife nga maoy gigamit sa suspek pagdunggab sa biktima ug sa iyang kaugalingon.
Nasayran usab nga ayha pa man ang insidente, selos usab ang hinungdan sa pagbalhin sa duha gikan Cabaguio ngadto sa Dumanlas
