DAVAO CITY – Nanghatag og mechanical ventilators ang Davao City Government alang sa upat ka mga COVID-19 Referral Hospitals aron magamit sa mga pasyente nga naglisod na og ginhawa.
Ang mga ospital nga gipangtunulan mao ang Alterado General Hospital, Davao Medical School Foundation Hospital, Davao Doctors Hospital, ug Anda Riverview Medical Center.
Mukabat usab ngadto sa 4.8 million pesos ang kinatibuk-ang kantidad sa mga ventilator, diin 1.2 million pesos ang presyo sa matag usa niini.
Una pa man sa pagpang-apud-apud sa mechanical ventilators, nanghatag na ang lokal nga panggamhanan sa Davao ug libuan ka mga Personal Protective Equipment kon PPE ngadto sa mga referral hospital sa mga milabayng semana isip pagtubag sa requests sa mga nahisgutang ospital.
Sa kasamtangan usab, ang maong referral hospitals adunay kinatibuk-ang 316 beds alang sa mga pasyenteng matapdan sa COVID-19.
