DAVAO CITY – Gikanayong ang nasinatian karon nga mga pag-ulan sa Japan partikular na sa Atami City sa Shizouka ang posibleng hinungdan sa mudslide diin anaa sa 20 ka mga tawo ang gikanayong natabunan.
Sumala pa kang Choi Moreno, nakabase karon sa Hakone Japan ug lumad nga taga Compostela Davao de Oro nga tungod sa kanunay nga pag-ulan sa lugar sukad kaniadtong milabay nga semana, daghanang mga residente na ang mihikling tungod sa kahadlok nga subling mahitabo ang pagdahili sa yuta.
Sa kasamtangan, aduna na matud pay duruha ang natalang namatay, napulo ang naluwas ug 20 ang missing.
Pipila sumala pa sa mga naluwas nga residente ang anaa karon sa mga evacuation center. Nasayran sa nahisgutan nga ang Hakone ug Atami City sa Japan ang susama nga nahimutang sa bukiron nga bahin sa lugar.
Gitataw sab sa nahisgutan nga bisan layo sila ug dyutay sa Atami City, dili pa gihapon sila mokumpiyansa sanglit duol lamang sab sila ug sapa nga sagad sab nga makasinate ug pagbaha sa higayon nga mubundak ang kusog nga ulan.
