DAVAO CITY – Gibutyag sa Municipal Disaster Risk Reduction and Management Office (MDRRMO) sa Magsaysay, Davao del Sur nga base sa ilang inisyal nga monitoring wala sumala pa silay natala nga danyos human sa sagunson nga gitay-og og linog ang ang nasampit nga lungsod.
Kahinumduman, alas 7:28 kagahapon sa buntag gitay-og og 4.8 magnitude ang Magsaysay, Davao del Sur samtang alas 12:22 kagahapon sab sa udto misentro ang 6.1 magnitude nga linog sa maong lugar.
Gibutyag ni Informatin Officer sa Magsaysay LGU nga si Anthony Allada, nagpadayon ang monitoring sa LGU sa Magsaysay kung aduna pay matala nga danyos gumikan sa nasampit nga linog.
Samtang gumikan sa kakusog sa linog naka-angkon ang kasikbit nga lugar sa Magsaysay og danyos diin natala ang dagkong liki sa atubangan nga bahin sa usa ka mall sa Digos, Davao del Sur.
Base sa facebook post sa Information Officer sa Davao del Sur nga si Sherwin Cesar, gipahibalo niini nga dunay natala nga danyos sa pipila ka balay-pamatigayunan sa Digos City.
Diin nagpadayon sab ang dugang monitoring sa mga gambalay ingon man establisyenmento kung aduna pay natalang danyos. Samtang sa pikas bahin, Gibutyag ni Alfredo Baloran hepe sa Davao City Disaster Risk Reduction and Management Office (CDRRMO) nga Walay natala nga dagkong danyos ug casualty sa dakbayan sa Dabaw human ang sagunson nga pagtay-og.
Gitino sa opisyal magpadayon pa ang monitoring damage assessment kauban ang mga structural engineers sa mga gambalay sa syudad.
