DAVAO CITY – Nadungagan ang mga indibidwal nga nagpositibo sa COVID-19 atol sa gipahigayong Aggressive Community Testing (ACT) sa Davao Region diin mitala og 206 ang nagpositibo sa COVID-19 sa dakbayan sa Dabaw.
Kahinumduman nga una nang gibutyag sa ahensya nga pagalaumang madungagan ang ihap sa mga magpositibo sa makamatay nga sakit.
Sumala sa pamahayag ni COVID-19 focal person Dr. Ashley Lopez, 40 ka mga barangay sa dakbayan ang gipailalom sa swab testing diin mikabat kini sa kinatibuk-ang 1,400 ka mga indibidwal.
Gikan sa maong ihap, nasuta nga 206 ang nagpositibo.
Dugang sa opisyal nga dako matud pa ang tabang sa gipahigayon nga ACT sa rehiyon gumikan malikayan pa nga mas mukuyanap ang makamatay nga virus.
Gitataw sab sa tinubdan nga dili kinahanglan nga matag adlaw magpahigayon og ACT.
Hinuon, gikumpirma sab ni Dr. Lopez nga bisan paman dili matag adlaw kini ipahigayon, aduna gihapoy mga personahe nga gi-deploy gikan sa DOH ug BFP.
Dugang butyag sa opisyal nga mas gipadali nila ang pag-abri sa dugang nga testing centers aron mas mapadali sab ang pagproseso sa mga swab samples dinhi sa dakbayan.
Ang sunod-sunod nga pahayag ni Dr. Ashley Lopez, COVID-19 focal person sa dakbayan.
