DAVAO CITY – Gitino sa Department of Agriculture (DA) 11 nga dili pa mamahimong magbuhi og baboy ang pipila ka mga hog raisers dinhi sa dakbayan ilabi na kadtong mga barangay nga una ng nakatala sa maong sakit sa mga baboy bisan pa man nga pipila ka bulan na nga ASF-free ang dakbayan sa Davao.
Sumala pa kang Armie Capuyan, focal person for ASF sa DA-11, pabilin pa gihapon ang gipahigayon nga monitoring sa ahensiya sanglit aduna pay natalang kaso sa ASF sa mga kasikbit nga lugar sa Davao region.
Gitataw sab ni Capuyan nga wala pay gipagula karon nga kamandoan ang ilang central office kung tugtan na nga makabuhi og baboy ang mga dapit sa dakbayan nga una ng naapektohan sa ASF.
Samtang nagpadayon sumala pa karon ang gipahigayon nga depopulation ug culling sa mga baboy sa kasikbit nga rehiyon partikular na sa Talicud Island sa Samal diin ubay-ubay na ka mga binuhing baboy ang gipamatay.
Gihan-ay na sab karon sa ahensiya ang ihatag nga hinabang alang sa mga apektado nga hog raisers.
Pahayag ni Armie Capuyan, Focal for ASF sa DA-11.
