DAVAO CITY – Gilayon nga gipahimangnoan ang mga residente nga nanimuyo sa low lying areas ingon man kadtong nanimuyo daplin sa baybayon human nga kalit na lamang nga nasinatian ang high tide hatud usab sa pagbaha sa mga kasapaan sa siyudad partikular na ang Davao river kini tungod sa pag-ulan nga nasinatian sa bukid kagahapon sa hapon.
Una ng gimandoan nga mohikling ang mga residente nga nanimuyo sa delikado nga lugar sanglit dili kalikayan nga kalit na lamang nga mosaka ang tubig gumikan sa nasinatian nga mga pag-ulan.
Sumala pa kang Alfredo Baloran, Hepe sa Davao City Disaster Risk Reduction and Management Office (Davao CDRRMO), pipila sa mga residente nga naapektohan ang gilangkuban sa Brgy. Tigatto, Brgy. Maa, Brgy. 19-B Garcia Heights ug Brgy. 76-A Bucana human nga apektado ang ilang mga panimalay sa tubig baha.
Kanunay karon ang pahimangno sa CDRRMO sanglit padayon pa nga masinatian sa dakbayan ang mga pag-ulan sa mosunod nga mga adlaw.
