DAVAO CITY – Gikanayon ni Dr. Ricardo Audan, Southern Philippines Medical Center (SPMC) officer-in-charge nga ang utilization rate sa beds nga alang sa COVID-19 patients ang anaa na karon sa “danger zone,” nga maoy hinungdan nga ila na karon nga gi-convert ang ilang old orthopedic ward sa area alang sa coronavirus disease (COVID-19) cases.
Sumala kang Audan, nga 20-bed orthopedic ward ang gi-ablihan alang sa COVID-19 patients sukad sa milabay nga adlaw hinungdan nga ang kapasidad sa isolation quarter anaa na sa 247 beds.
Niining milabay nga adlaw, ang SPMC nakatala na ug 227 o 91.90% sa 247 beds sa isolation ward ang na-okupa. Base sa critical care utilization sa Department of Health, ang bed capacity ang anaa sa “safe zone” kung ang occupancy rate anaa sa 1-30%, “warning zone” kung anaa sa 31-71%, ug “danger zone” kung anaa sa 71-100%.
Nakatala sab ang nahisgutan nga balay tambalanan ug 28 o 84.85% sa 33 intensive care unit beds ang na-okupa. Gitataw sab ni Audan nga pipila sa mga pasyente sa ICU diin maayo na ang ilang kondisyon ang gibalhin sa isolation ward aron nga ipailalom sa obserbasyon.
Gikanayong ang mild cases sa isolation ward mamahimong ibalhin sa temporary treatment ug monitoring facilities o sa satellite facility sa Davao Doctors Hospital sa Barangay Dumoy.
Gikanayong ang moderate ug kritikal nga kaso ang i-confine sa ICU samtag ang mga mild ang ipahimutang sa TTMF. Tugtan sab sa hospital ang pag-abli ug 300 ngadto na sa 500 COVID-19 beds.
Sa kasamtangan, aduna pay available facilities ang balay tambalanan nga mamahimong maka-akomodar ug COVID-19 admissions apan sa kasamtangan dili pa kini andam sanglit kulang sab ang ilang mga personahe.
Kung kahinumduman, nag-deploy ug dugang personahe nga nurse ang Philippine National Police aron motabang pagdumala sa COVID-19 facility sa SPMC.
Plano sab sa hospital nga i-tap ang dugang pa nga mga nurses gikan sa Bureau of Fire Protection (BFP)-Davao aron nga motabang sab kanila.
