DAVAO CITY – Gibutyag ni southern Philippines Medical Center (SPMC) officer-in-charge Dr. Ricardo Audan nga padayon sila nga nangita ug dugang pa nga mga katre nga mamahimong maka-cater sa nagpadayon nga pagsaka sa ihap sa mga natakdan ug Covid-19 nga naka-admit karon sa maong hospital.
Una ng gibutyag ni Audan nga gawas sa suliran sa mga katre, kulang sab ang ihap sa ilang mga personahe.
Nagtuo si Audan nga ang usa sa mga hinungdan sa pagsaka sa Covid-19 patients mao ang “uncoordinated referrals” gikan sa nagkadaiyang areas sa gawas sa siyudad.
Kini sab sumala pa ang rason nga mipagula si Davao City Mayor Sara Duterte-Carpio ug Executive Order (EO) 53 nga nag-require ug Covid-19 testing sa mga pasyente nga gina-refer sa bisan asa man nga hospital sa siyudad ug sa uban pa nga mga rason.
Subay sa data sa SPMC, aduna sumala pay 35 percent uncoordinated Covid-19 patients ang naka-admit sa balay tambalanan hinungdan nga misaka ang mga naka-admit nga pasyente nga natakdan sa virus.
Una na sab nga gibutyag ni DOH-Davao Assistant Director Lenny Joy Rivera nga nagmugna na sila karon ug Covid-19 surge capacity plan human nga anaa na karon sa “danger zone” ang ward beds sa Covid-19 patients dinhi sa Davao Region.
Kahinumduman nga ang SPMC ug Davao Regional Medical Center sa Tagum City, Davao del Norte ang bugtong nga mga Covid-19 referral hospitals sa rehiyon.
Hinuon ang Davao Medical School Foundation, Davao Doctors Hospital (DDH), ug Metro Davao Medical and Research Center ang kasamtangan nga gi-tap isip reserved hospital sa dakbayan.
