DAVAO CITY – Naglaom si Davao City Mayor Sara Duterte-Carpio nga tugtan sa Inter-Agency Task Force on Emerging Infectious Diseases (IATF-EID) nga magpabilin ang dakbayan ilalom sa modified general community quarantine (MGCQ) sa Hulyo 31.
Hinuon gikanayon sa opisyal nga mag-depende pa gihapon kini sa himuon nga assessment sa IATF kalabot sa nahimong lakang sa siyudad sa coronavirus disease (Covid-19).
Mo-apela sumala pa ang lokal nga kagamhanan sa higayon nga mohatag ang IATF sa ilang inisyal nga Covid-19 classification. Gikanayong usa kini sa mga remedyo nga mamahimong himuon sa siyudad.
Kahinumduman nga plano unta sa IATF nga ibalik ang siyudad sa general community quarantine (GCQ) human ang paspas nga kaso sa pagsaka sa Covid-19.
Sa bag-ohay nga assessment, misaka ang kaso sa Covid-19 sa dakbayan sukad nga gibalik ang commercial air flights nga maoy hinungdan nga gipatuman sa siyudad ang pagdala ug negative reverse transcription-polymerase chain reaction (RT-PCR) test result sa tanan nga mga pasahero nga moadto sa dakbayan agi sa Francisco Bangoy International Airport (Davao International Airport).
Kinahanglan sumala pa ang RT-PCR test result sa mga pasahero ayha kini tugtan nga makagawas sa dakbayan ug kung walay RT-PCR test, libre kini nga himuon sa airport apan kinahanglan nga hulaton sa pasahero ang iyang resulta.
