DAVAO CITY – Gi-andam na ang kaso batok sa mga suspek nga gikanayong mi-atake sa usa ka plantasyon sa saging sa Purok 6, Barangay Mabuhay, Carmen sa milabay nga adlaw samtang padayon pa nga gipangita sa kapulisan ang uban pa nga mga suspek nga misibat dala ang armas sa guwardiya nga ilang napatay.
Kahinumduman nga gi-atake ang Puyod Banana Farm sa gibana-banaang 80 ka mga armadong grupo diin duruha ka mga security guard ang napatay , duruha usab sa bahin sa armadong grupo samtang lima sab kanila ang naangol. Gipaslak na sab karon sa presohan ang 18 ka mga nadakpan ato sa panghitabo.
Kahinumduman nga patay diha-diha ang mga security guards nga sila si Kenneth D. Cabasingan, hamtong ang pangedaron, minyo, residente sa Mabini, Davao De Oro ug Erben E. Rosalin, hamtong ang pangedaron, minyo, lumulupyo sa Barangay Panibasan, Maco, Davao De Oro, susama nga security guard ilalom sa Cross Fire Security Agency.
Patay usab sa maong insidente ang mga suspek nga sila si Alijo Ecat Villa, 69, minyo, laborer, molupyo sa Purok 5, Barangay Manay, Panabo City nga gideklarang dead on arrival sa Rivera Medical Hospital sa siyudad sa Panabo ug alyas Jun Ortega, hamtong ang pangedaron nga taga New Israel, Makilala, North Cotabato.
Angol usab sa maong panghitabo ug nagpa-alim na karon sa balay tambalanan sila si Angelito Balaga Suarez, 39, Marjon Villa Adlaon, 33, ulitawo, Carpio Ecat Villa, 48, ulitawo, Leon Villa Dumanda, 59, minyo, ug Flavio Censico Villa, hamtong ang pangedaron susama nga mga laborer ug residente sa New Israel, Makilala.
Una ng nasayran kang Police Major Jay Nacedal, chief of police sa Carmen Municipal Police Station, una na matud pa nga nalambigit ang nahisgutan sa ilegal nga pagsulod usab sa maong plantasyon sa saging kaniadtong milabay nga Enero apan nababagan lamang sa guwardiya ug usa kanila ang nadakpan.
Samtang sa 18 ka mga nadakpan, 12 ang lumulupyo sa Panabo City, lima ang sa Carmen samtang ang usa taga Dakbayan sa Davao nga giingong mga kanhi trabahante sa maong plantasyon. Gikanayong isyu sa yuta ang hinungdan sa maong insidente ug gisakyan lamang sa uban nga grupo hinungdan nga migrabe ang kagubot.
