DAVAO CITY – Gitabangan sa ahensiya sa City Tourism Operation Office (CTOO) ang mga na-stranded nga residente gikan sa mga kasikbit sa rehiyon sa Mindanao sukad nga gipatuman ang community quarantine kaniadtong bulan sa Marso ning kasamtangan nga tuig.
Kahinumduman nga daghanang mga mga stranded nga residente ang nagpadayag sa ilang pagpasalamat kay makauli na sila sa ilang tagsa-tagsa ka mga lugar ilabi na nga kadaghanan sa mga nahisgutan ang nawad-an na ug panginabuhian ug wala na sab silay sarang nga ikagasto sa ilang mga panginahanglanon.
Ang nahisgutan nga lakang kabahin pa gihapon sa Balik-probinsiya nga gidalit sa lokal nga kagamhanan. Sumala pa kang CTOO head Generose Tecson, nakiglambigit na sila sa mga kasikbit nga rehiyon sa Mindanao sa pag-uli sa mga natanggong nga mga residente.
Gitataw sab sa opisyal nga angayang makiglambigit una ang mga na-stranded ngadto sa LGUs sa ilang lalawigan aron nga masayran niini ang mga gikinahanglan nga rekisitos ayha sila tugtan nga makauli sa ilang tagsa-tagsa ka mga panimalay.
Kahinumduman nga una ng gibutyag ni Davao City Mayor Inday Sara Duterte-Carpio nga walay problema kung mouli na sa ilang tagsa-tagsa ka mga probinsiya ang mga stranded nga mga residente sa siyudad apan siguruhon lamang una sa mga nahisgutan nga dawaton kini sa ilang pagbalik sa lalawigan.
