DAVAO CITY – Luyo sa padayon nga bahad sa coronavirus disease (Covid-19) pandemic sa dakbayan sa Davao, gi-awhag ni Davao City Mayor Inday Sara Duterte-Carpio ang mga tulonghaan nga ipadayon ang pag-abli sa klase karong tuiga pinaagi sa home school ug distant learning.
Kini ang pahayag sa Mayor human nga gibutyag ni Education Secretary Leonor Briones nga ang school year 2020 – 2021 mag-abli sa Agosto 24 “physically o virtually” depende sa sitwasyon sa Covid-19 pandemic sa maong panahon.
Apan gikanayon sa Mayor nga subay sa pakighinabi niya kang Department of Education-Davao Region (DepEd-Davao) assistant director Maria Ines Asuncion, dili sumala pa physical setting ang pag-abli sa klase.
Dugang pa ni Mayor Inday nga ang mga magtutudlo ang kinahanglan nga mo-report sa ilang tagsa-tagsa ka mga tulonghaan sa bulan sa Hunyo alang sa orientation sa bag-ong modalities.
