DAVAO CITY – Plano karon sa lokal nga panggamhanan nga magdugang og tulo ka medical facilities nga langkuban sa tulo ka mga private medical facilities aron nga modawat ug mga pasyente nga natakdan og coronavirus sa higayon nga padayon ang pagsaka sa kaso niini dinhi sa siyudad.
Sumala pa kang Mayor Inday Sara Duterte, nakiglambigti na ang lokal nga panggamhanan sa mga medical facilities nga magsilbing “stand by” sa higayon nga ang pasilidad sa Southern Philippine Medical center (SPMC) dili na maka-akomodar og pasyente ilabi na kung padayon ang pagsaka sa kaso sa coronavirus Disease (COVID-19).
Sa kasamtangan, wala una hinganli sa Mayor ang nahisgutan nga medical facilities. Una ng gibutyag ni Mayor Sara nga dili angayan nga modawat ang mga pribadong ospital ug mga pasyente nga apektado sa coronavirus aron malikayan ang kontaminasyon sa ilang pasilidad ug health workers, inay i-refer na lamang kini sa SPMC nga maoy bugtong hospital nga modawat ug mga pasyente nga apektado sa coronavirus.
