DAVAO CITY – Anaa lamang sa 2,000 ka mga public utility jeepney (PUJ) drivers ang mi-avail sa 3,000 slots nga financial aid gikan sa lokal nga panggamhanan.
Sumala pa kang Norman Baloro, Presidential Commission for the Urban Poor (PCUP) supervising commissioner for Mindanao, aduna pay slots gikan sa 54 routes ang available sa kasamtangan.
Una na matud pa nga gibutyag ni City Transport and Traffic Management Office (CTTMO) head Dionisio Abude, nga abli kini sa PUJ drivers nga buot maka-avail ug financial assistance tungod sa hugtanon nga pagpatuman karon sa social distancing sa Department of Transportation (DOTr).
Subay sa listahan sa CTTMO, ang Toril adunay pinakadaghan ug ihap sa mga slots nga anaa sa 350 drivers.
Gitataw sab ni Baloro, Tulong Panghanapbuhay sa Ating Disadvantaged/Displaced Workers (Tupad) program in-charge, nga base sa ulahing CTTMO data, ang slots alang sa mga driver nga nag-operate sa mga rota sa Toril, Calinan, Mandug, Callawa, Catalunan Grande, ug Jade Valley ang napuno na sa kasamtangan.
Gi-anunsiyo ang financial assistance ni Davao City Mayor Sara Duterte-Carpio isip mitigating measures nga gihatud sa the social distancing sa mga PUJs, nga miresulta sa dakong kawad-on ug income sa mga apektadong drivers.
Apan bugtong 3,000 PUJ drivers lamang ang makadawat ug P11,880 financial aid pinaagi sa Tupad program sa Department of Labor and Employment (Dole).
