DAVAO CITY – Gibutyag ni Davao City Mayor Sara Duterte-Carpio nga mitamud na ang Iglesia ni Cristo (INC) sa iyang panawagan gumikan kay gisuspende na matud pa sa nahisgutan nga simbahan ang ilang religious activities.
Apan gitataw sa Mayor nga text message pa lamang ang iyang nadawat gikan sa gikanayong miyembro sa INC hinungdan nga ila pa kining kumpirmahon.
Hinuon mapasalamaton si Mayor Inday sa INC sa hinanali nga aksiyon ug pagtamud sa panawagan alang sa suspensiyon sa ilang mga aktibidad gumikan sa padayon nga bahad sa coronavirus disease (Covid-19).
Naglaom na lamang ang opisyal nga ipatuman kini sa INC sa tibuok rehiyon nga gipailalom na karon sa lockdown.
Nangayo sab ug pasaylo si Mayor Inday sa nahimong pahayag niini nga mohimo siya ug legal actions batok sa simbahan sa higayon nga dili motamud sa kamandoan sa siyudad.
Una ng gibutyag sa opisyal nga mamahimo pa gihapon nga makapadayon ang mga religious group sa ilang aktibidad apan himuon lamang kini pinaagi sa internet.
