DAVAO CITY – Gibutyag sa Department of Health (DOH) Davao nga nakatala na sila karon ug 53 patients under investigation (PUIs) sa Davao Region samtang ang person under monitoring (PUM) misaka sa 1,186 sulod lamang sa Marso 16.
Subay sa DOH Davao update, nga sa ihap sa mga PUIs, 24 niini ang naka-confine sa duruha ka mga state-run hospitals sa rehiyon nga gilangkuban sa Davao Regional Medical Center (DRMC) sa Tagum City ug Southern Philippines Medical Center (SPMC) sa dakbayan sa Davao.
Gitataw sab sa DOH nga ang kinatibuk-ang 29 PUIs ang nakagawas na human nga ang ilang laboratory results nag-negatibo sa coronavirus disease (Covid-19).
Samtang sa ihap sa PUM, anaa sa 187 ka mga indibidwal ang cleared sa maong balatian.
Usa niini ang namatay tungod sa trauma nga hinungdan sa falling accident ug wala kini kalabutan sa Covid-19. Kinatibuk-ang 1,009 personalities ang gipailalom karon sa obserbasyon.
Kahinumduman nga 1 na ang natalang nag-positibo sa Covid-19 dinhi sa Davao region samtang nagpabilin nga gawasnon ang siyudad sa maong balatian.
