DAVAO CITY – Boluntaryo nga mipailalom si Davao City Vice Mayor Sebastian “Baste” Duterte sa 14 ka adlaw nga self-quarantine human nga nakasinate kini ug sintomas sa novel coronavirus disease (COVID-19) tulo ka semana human kini mibisita sa Metro Manila.
Kini mismo ang gibutyag ni Davao City Mayor Sara Duterte.
Sumala sa Mayor nga sa kasamtangan, gi-isolate ni Baste ang iyang kaugalingon gikan sa iyang pamilya human nga nakasinate kini ug sore throat, ubo ug kalintura.
Gikonsidera sumala pa karon ang iyang kaugalingon nga a person under monitoring (PUM).
Sumala sa Department of Health, ang PUM mao ang tawo nga adunay travel history sa mga nasod o areas nga adunay nakumpirma nga kaso sa COVID-19 apan wala mipakita ug senyales o sintomas sa disease.
Bisan nga nagpakita sumala pa ug sintomas ang Bise Mayor, wala niya kini gitambagan nga mopailalom sa testing sanglit tulo ka semana na ang milabay dihang miadto kini sa Manila o sobra na sa 14-day incubation period sa novel coronavirus disease.
Nagtuo ang Mayor nga nakasinate lamang si Baste ug tonsillitis o paghubag sa iyang tonsils nga sagad sumala pa nga masinatian sa iyang igsuon.
Si Baste mao ang kamanghuran nga anak ni Pangulong Rodrigo Duterte sa iyang kanhi asawa nga si Elizabeth Zimmerman.
