DAVAO CITY – Miduso karon og counter demand ang mga tag-iya ug unit sa Magallanes Residences alang sa mas taas nga buy back o refund sa ilang mga unit.
Gipangayo sa mga tag-iya og unit ang 175% nga buy back sa katarungan nga alang sumala pa kini sa ilang investment.
Na-una nang mitanyag ang developer og 125% nga buy back o refund sa mga unit owners ug P40,000 nga displacement fee nga hangtud karon pabilin pang wala mahatag ug madawat ngadto sa mga nahisgutan.
Na-una nang gibutangan og red tag ang 3 ka mga buildings sa Magallanes Residences human maka-angkon og daghang damyos gumikan sa sunod-sunod nga linog sa syudad.
Gimanduan na usab sa lokal nga kagamhanan ang mga okupante nga mobiya na sa ilang mga units gumikan kay dili na kini luwas pang kapoy-an gumikan sa daghang mga crack sa bongbong, kesame ug poste sa nahisgutang building.
Hinuon, nagpadayon na ang repair niini apan alang sa mga okupante, dili na sila mobalik sa kahadlok nga mahugno na ang building kung subling motay-og ang linog.
