DAVAO CITY – Mi-apela si DA XI Regional Director Ricardo Onate, Jr. sa katawhan nga likayan ang pag-adto sa Don Marcelino diin nahitabo ang outbreak sa African Swine Fever (ASF).
Gipasabot ni Onate nga si bisan si kinsa nga mobisita sa ground zero mamahimong carrier ug dako ang posibilidad nga mokatag ang disease sa uban nga lugar.
Gitataw sa nahisgutan nga bisan ang ligid sa mga sakyanan mamahimo sumala pa nga carrier sa nahisgutan nga sakit nga makaapekto sa mga baboy hinungdan nga mas maayo sumala pa nga limitahan lamang ang mga personahe nga pasudlon sa maong area.
Gipasalig sa opisyal nga mohatag sila og update kalabot sa maong sitwasyon sa lalawigan diin himuon nila kini sa lungsod sa Malita.
Kahinumduman nga apektado karon ang pipila ka mga hog raisers human nga miabot na sa liboan ka mga binuhing baboy sa lalawigan ang namatay gumikan sa ASF.
