DAVAO CITY – Gipasalig sa ahensiya sa Department of Public Works and Highways (DPWH) 11 nga dili sila magpanuko nga moduso og reklamo batok sa mga badlungon nila nga mga empleyado ilabi na kadtong mga nakahimo og salaod.
Tipik lamang kini human ang ulahing insidente diin nasikop ang usa sa ilang mga miyembro nga gikanayong nalambigit sa iligal nga druga.
Una ng giila ang suspek nga si Jovanni Tabudlong Pardillo alyas Vanvan, Admin Aide 1 sa DPWH 11 ug residente sa Dumalag 1, Matina Aplaya ning dakbayan sa Dabaw.
Si Pardillo nga giila isip high value target personality sa kapulisan ang nasikop sa mga ginsakpan sa Talomo Police station uban ang PDEA 11 alas 8:45 sa gabii sa gilusad nga joint buy bust operation sa Box Dumalag 1, Matina Aplaya ning syudad human namaligya og shabu.
Nakuha gikan sa posisyon sa dinakpan ang shabu nga gibana-bana nga nagkantidad og usaka libo ka pesos.
Sa pikas bahin, gidayeg usab ni Police Lt. Col Ronald Lao, hepe sa Talomo PNP ang iyang mga ginsakpan sa nahimo niining kalampusan.
Gipasalig usab niini ngadto sa publiko nga mas pahugtan pa sa kapulisan ang kampanya niini aron masumpo ang mga krimen ug ang pagkaylap sa iligal nga druga sulod sa ilang area of responsibility.
