DAVAO CITY – Arestado ang usa ka Canadian National human nga gikulata niini ang amahan sa iyang live in partner sa Babak, Island Garden City of Samal.
Giila ang suspek nga si Robert Gary Floyd, 42 anyos, pintor ug usa ka Canadian Natioinal nga kasamtangang nagpuyo sa Sitio Basaw, Barangay Camudmud, Babak District, IGACOS.
Gikumpirma ni Barangay Capt. Rande M. Tambilawan nga nahitabo ang kagubot pasado alas dies sa gabi sa Purok. 1, Brgy. San Isidro, Babak District, IGACOS.
Nag-wild matud pa si Floyd ug nanghasi sa mga tawo pinaagi sa pagsinggit-singgit og mga bastos ug law-ay ngas mga pulong ug gisumbag pa niini ang mismong amahan sa iyang live-in partner.
Dugang pa sa opisyal nga bisan siya ug ang mga miyembro sa Civilian Volunteer Organization sa ilang barangay ang gihagit usab og sumbagay sa nasangpit nga langyaw.
Gisulayan pa matud pa sa maong Canadian national nga musukol ug muikyas sa dihang sikopon na unta kini sa mga otoridad busa napugos ang mga nahisgutasn nga mugamit na og pwersa.
Sa karon, anaa na sa kustodiya sa Babak Police Sub Station si Floyd alang sa posibleng kaso nga ipasaka batok kaniya.
