DAVAO CITY- Giduso karon sa usa ka grupo sa mga negosyanteng Chinese ang paggamit sa mga paspas nga ferry o mga fastcrafts aron nga mas mapadali na ang pagbiyahe gikan sa downtown area ning dakbayan sa Davao paingon sa Toril ug vice versa.
Kini mismo ang gibutyag ni Konsehal Conrado Baluran human nga aduna matud pay mga negosyante ang misugyot aron nga makunhuran ang oras sa pagbiyahe tali sa duha ka mga nahisgutang lugar.
Kung subayon sa Google Map, anaa matud pa sa 50 minutos ang oras sa pagbiyahe tali sa duha ka lugar ug kini gawas pa kung dili bug-at ang dagan sa trapiko.
Sumala pa ni Baluran nga kung mubiyahe matud pa pinaagi sa dagat, mas paspas kini og duha ka higayon kung itandi sa by land nga pagbiyahe.
Dugang pa sa konsehal nga maayo matud pa kini nga proyekto gumikan kay ma-decongest niini ang traffic sa downtown.
Nasayran nga mga paspas nga ferry ug fastcrafts ang sagad nga mode of transportation sa Cebu ug Bohol aron nga makaabot sa mga kasikbit niini nga isla.
Apan bisan paman niini, giangkon sa konsehal nga kinahanglan pa gihapon kining ipailalom sa feasibility study gumikan mamahimo kining makaapekto sa mga driver sa Public Utility Vehicle (PUV).
Laraw matud pa sa mga negosyante nga magtukod ug mga terminal sa Sta. Ana Pier ug sa Daliao fish port sa Toril.
Sa karon dili pa buot sa mga Chinese nga magpaila gumikan sa kasamtangan, nagpadayon pa ang ilang paghan-ay sa maong sugyot.
