DAVAO CITY – Mihangyo ang usa ka advocacy group ngadto sa City Council nga momugna og task force nga motutok sa environmental crimes ug moprotekta sa kasapaan sa dakbayan.
Subay sa sugyot, ang task force gilangkuban sa Watershed Management Council, City Environment and Natural Resource Office, National Commission in Indigenous People, Philippine National Police, Armed Forces of the Philippines ug academe.
Una ng nagpadala og sulat ang Euro Generics International Philippines (EGIP) foundation, usa ka organisasyon nga ilado sa forest ug biodiversity protection ngadto kang Konsehal Pilar Braga diin ilang gisugyot ang mga rekomendasyon alang sa pag-protekta sa Panigan-Tamugan ug Talomo-Lipadas watersheds.
Pipila sa ilang namatikdan nga mga problema mao ang deforestation ug pagkadaut sa kinaiyahan.
Kalakip sa ilang gisugyot mao ang pagpatuman og bayad alang sa environmental services diin ang salapi nga makuha niini maoy gamiton aron nga pundohan ang mga proyekto aron pagbalik sa habitats ug ecosystems nga nadaut tungod sa binuhatan sa mga tawo ingon man sa natural nga kalamidad.
