DAVAO CITY – Nahimong hapsay ug malampuson nga napahigayon ang ‘Pahalipay sa Pasko’ ni Pangulong Rodrigo Duterte nga gidagsa sa halos 30,000 ka mga tawo.
Nasayran nga sayo pa lamang sa buntag gisugdan na ang paglinya ug natapos kini pasado alas tres sa hapon.
Dili lamang taga-dakbayan sa Davao ang milinya kung dili lakip na kadtong nanimuyo sa mga kasikbit nga lugar sa Davao region.
Malipayon ang mga nangayo og pahalipay gumikan kay adunay gipahigayon usab nga programa sa pagpanguna ni Davao City Mayor Inday Sara Duterte Carpio.
Human ang pagpanghatag og pahalipay, gilayon sab dayon nga gihimo ang restoration sa lugar aron nga mobalik gilayon sa normal ang sitwasyon sa maong dapit.
Samtang sa iyang nahimong mensahe nga gipahigayon nga aktibidad, gitambagan ni Davao City Mayor Inday Sara Duterte-Carpio ang mga tawo nga bisan walay lamian nga handa panahon sa kapaskohan, mas mahinungdanon pa gihapon nga maangkon ang kalipay sa matag pamilya.
Kahinumduman nga ang Pahalipay sa Pasko ang usa sa mga tinuig nga aktibidad ni Pangulong Rodrigo Duterte bisan kaniadtong Mayor pa lamang kini sa dakbayan.
