DAVAO CITY – Gibutyag sa back to back Southeast Asian (SEA) Games Judo gold medalist Filipino-Japanese Mariya Takahashi nga na-miss na niya ang iyang mga higala ug paryente sa iyang inahan sa iyang hometown sa Maragusan, Compostela Valley, nga wala na niya nabisita sulod na sa pito ka tuig.
Sumala sa 18 anyos nga nakaangkon sab og bronze 30th SEA Games Judo competition, gikonsidera niya ang lugar sa iyang inahan isip iyang pinuy-anan bisan nga dugay na sila nga mibalhin sa Panabo City diin siya nagtuon sa iyang first ug second grades.
Tungod sumala pa sa iyang hugot nga schedule ang rason kung nganong wala na siya nakabisita sa Comval ug mobalik sab dayon sila sa Japan alang sa iyang klase.
Malipayon sumala pa ang nahisgutan gumikan sa iyang naangkon nga bulawang medalya ug team bronze alang sa nasod.
Kahinumduman nga napildi sa women’s team event ang Malaysia, 3-2, alang sa bronze medal.
Misaad sab ang nahisgutan nga magbansay og tarung aron nga madepensahan ang iyang SEA Games gold sa 2021.
