DAVAO CITY – Bisan nga adunay mipatigbabaw nga anti-smoking ordinance ang dakbayan, nagpabilin sumala pa nga taas ang ihap sa mga nadakpan gumikan sa pagpanigarilyo nga anaa sa 10,044.
Ang nahisgutan nga ihap natala sukad Enero hangtud Oktubre 2019.
Sumala pa sa Police Regional Office (PRO)-Davao Regional Operations Management Division, kinatibuk-ang 16,564 smokers ang nadakpan gumikan sa nahisgutan nga kalapasan dinhi sa rehiyon.
Subay sa data, ang Davao City Police Office (DCPO) ang nag-una sa listahan nga anaa sa 10,044 apprehensions; Davao Occidental Police Provincial Office (DOCPPO) nga adunay 2,422; Davao Oriental PPO nga adunay 1,837; Davao del Sur PPO nga adunay 858; Davao del Norte PPO nga adunahy 713; ug Compostela Valley PPO nga adunay 680.
Nasayran sa record gikan PRO nga sukad Nobyembre 1 hangtud 24 nakasikop sila ug 1,072 smokers nga nakalapas sa ordinansa samtang kadtong mga minor de edad ang gipapauli sa ilang balay.
Bugtong usa lamang ang nasikop human nga migamit kini ug vape sa Times Beach, Ecoland diin gipahamtangan kini ug penalty ug gikumpiska ang e-cigarette device niini.
