DAVAO CITY – Padayon ang kasundalohan sa ilang pagpaningkamot aron nga gukdon kadtong mga adunay dautan nga plano sa katilingban.
Kahinumduman nga nakarekober ang tropa sa kasundalohan og mga nagkadaiyang tag-as nga klase sa armas human ang nahitabong engkuwentro tali sa mga rebeldeng grupo sa Sitio Panganason, Brgy. King King, Pantukan, Compostella Valley province.
Sumala pa kang 2Lt. Kim Carlos, civil-military operations officer sa 71st Infantry Battalion (71IB) Philippine Army, nga ang ilang tropa ug mga personahe sa Pantukan Municipal Police Station ang miresponde human nakadawat og impormasyon gikan sa mga sibilyan kalabot sa presensiya sa duruha ka mga armadong grupo nga nagapang-harass sa mga residente sa lugar.
Usa sa mga suspek nga si David Aminan Orsame, 28 anyos ang samdan atol sa engkuwentro.
Hinuon wala sumala pay casualties sa tropa sa kagamhanan samtang si Orsame nga nakaangkon og samad ang nasikop sa militar.
Narekober sa kasundalohan ang M-14 rifle, M-16 Armalite rifle, M-203 grenade launcher, ug nagkadaiyang klase sa bala.
Dali pa nga gidala sa ospital si Orsame samtang gi-andam na sa 71IB ug Pantukan MPS ang pagduso ug kaso batok sa nahisgutan.
Mapasalamaton sab si Lt. Col. Esteveyn Ducusin, commander sa 71IB, sa mga residente sa lugar sa padayon nga suporta nga ilang gihatag sa militar.
Gidayeg sab ni Maj. Gen. Jose Faustino Jr., commander sa 10th Infantry Division ang tropa sa kasundalohan sa pagkasikop kang Orsame ingon man sa mga narekober nga mga armas.
