DAVAO CITY – Walay nakitang foul play ang kapulisan kalabot sa pagkamatay sa usa ka guwardiya nga nakitang wala nay kinabuhi sulod sa buhatan sa security agency sa Orange Valley, Barangay Magugpo South sa milabay nga adlaw.
Sa ulahing imbestigasyon sa otoridad, napalgan na lamang nga walay kinabuhi ang biktima nga nailang si Albert Almonicar, 28, minyo, guwardiya sa Dasia Security Agency ug residente sa Purok 11, Kapatagan, Laak, Compostela Valley Province.
Gipukaw pa sa iyang kaubanan sa trabaho si Almonicar apan wala na matud pa kini nimata.
Apan ayha kini nakabsan sa iyang kinabuhi, nakasinati sumala pa og kalintura ang nahisgutan.
Girekomenda sa otoridad ang pagpailalom sa otopsiya sa patay’ng lawas sa biktima aron nga masayran ang hinungdan sa kamatayon niini.
Gipahiluna ang biktima sa usa ka punerarya sa nahisgutan nga lungsod.
