DAVAO CITY – Misaka na matud pa ang ihap sa mga kumpirmadong nakaangkon ug sakit nga dengue sa siyudad ngadto sa 2,500 sulod lamang sa Oktubre 2019 kini base sa data sa City Health Office (CHO).
Sumala sa CHO, ang kaso sa dengue sa siyudad ang anaa sa 2,481 sa unang 10 ka bulan ning kasamtangan nga tuig.
Samtang sa bulan sa Agosto nakatala ang ahensiya ug 505 ka kaso.
Ang nahisgutan nga ihap ang mas taas kung itandi sa 2018 nga adunay 1,609 sa susamang panahon.
Dinhi sa siyudad, natala sab ang 9 ka mga namatay sulod lamang sa bulan sa Oktubre.
Hinuon mas ubos kini sa 14 nga mga namatay sa milabay nga tuig.
Samtang giila sab sa CHO ang mga lugar sa Talomo North, Toril, Agdao, Talomo Central, ug Buhangin nga mga dengue hotspot.
Natala sab sa ahensiya ang duruha nga namatay sa bulan sa oktubre.
Nasayran sa health worker, ang pasyente nga bag-ohay pa lamang namatay ang nanimuyo sa Mintal sa Tugbok District.
Gikanayon ni CHO technical division chief Julinda Acosta nga laoman nga mosaka pa ang kaso sa dengue sugod Agosto hangtud Disyembre sanglit rainy season ang maong panahon.
