DAVAO CITY – Hitsas na ang pag-abli sa Pasko Fiesta 2019 diin laoman ang mabulokon nga opening niini sa Nobyembre 22.
Sa kasamtangan, okupado na ang mga personahe sa City Environment and Natural Resources (CENRO) sa pagpahimutang ug mga nagkadaiyang dekorasyon palibot sa dakbayan partikular na sa mga center island sa kadalanan aron nga mas nindot ang opening sa pasko fiesta nga adunay tema nga Santa’s Toy Factory.
Sumala pa kang Generose Tecson, head sa City Tourism Office (CTO) nga sama sa milabay nga tuig, anaa pa gihapon sa P22 milyon ang igahin nga pondo alang sa maong aktibidad.
Laoman sab sumala pa nga sadya ang opening gumikan kay aduna sumala pa silay sorpresa alang sa mga bata.
Gani, anaa pa gihapon ang 3D mapping atubangan sa City Hall ning dakbayan.
Anaa na matud pa karon sa 85 porsyento ang ilang pagpangandam ug gisugdan na sab ang pagbutang ug mga Christmas lights sa mga punoan sa kahoy sa may Rizal park.
