DAVAO CITY – Pasakahan na sa Sasa Police Station ug kasong kalapasan sa Presidential Decree 1727 o Anti-bomb Joke Law ang usa ka 40 anyos nga lalaki nga una ng nag-bomb joke samtang anaa sulod sa Davao International Airport.
Kahinumduman nga wala nadayon ang biyahe ni alyas Ramon residente sa Monkayo, Compostela Valley ug diretso kini nga gipaslak sa presohan human nga nagti-aw nga adunay unod nga bomba ang dala niining bagahe.
Pinasikad sa imbestigasyon, samtang gi-assist sa wala hinganli nga lady flight crew ni alyas Ramon, gipangutana kini kung unsa ang sulod sa dala niining bagahe.
Nagti-aw ang nahisgutan nga “KANANG BOMBA” hinungdan nga gipahibalo gilayon sa ilang lead cabin crew ngadto sa airport authorities ang maong insidente hinungdan nga gisikop kini ug gipagawas sa eroplano.
Kahinumduman nga ilalom sa balaod, ang pagti-aw nga adunay dala nga bomba usa ka kalapasan sa balaod ug mamahimong makamulta ug P40,000 o pagkabilanggo sulod sa kapin lima ka tuig depende sa desisyon sa korte.
Subling nagpahinumdom si PBGen Filmore B Escobal nga likayan ang susama nga joke nga mamahimong mohatud ug alarma ngadto sa uban.
