DAVAO CITY – Malampuson ang gipahigayon nga Ceremonial Torch Relay sa 30th South East Asian (SEA) Games 2019 dinhi sa dakbayan sa Davao kagahapon.
Gipangunahan mismo ni Philippine Sports Commission Commissioner Charles Maxi ug Davao City Vice Mayor Sebastian ‘Baste’ Duterte, Local Government Units ug mga atleta nga gikan sa dakbayan ang nahisgutan nga prestihiyosong Ceremonial Torch Relay.
Grabe nga gikalipay sa lungsod nga nahimong parte sa usa ka historical event diin first time pa lamang kini nga gipahigayon dinhi sa dakbayan.
Sa eksklusibong pakighinabi sa Bombo Radyo Davao kang Judo Bronze Medalist World Junior Sambo Championship 2019 Sydney Sy Tancontian, grabe ang iyang kalipay nga mamahimong usa sa mga torch bearer sa torch relay.
Gitataw sab ni Tancontian nga himuon nila ang tanan aron nga ibarog ang bandera sa Pilipinas sa nagkaduol nga 30th SEA Games 2019.
Gawas kang Tancontian, kalakip sab sa torch relay ang Aiba Womens World Boxing Championships 2019 gold medalist Nesthy Petecio ug ang 19 anyos nga nahimong wakeboard double bronze 2015 SEA Games medalist nga si Mikee Selga.
Kalakip sab sa mga dinapit sa maong ceremonial torch relay si Sen. Christopher Lawrence ‘Bong’ Go ug aktor nga si Robin Padilla.
Kahinumduman nga gikan sa last host country nga Malaysia ang Torch ug gisugdan dinhi sa dakbayan ang torch relay ayha ipaagi sa nagkadaiyang bahin sa nasod sama sa Cebu, Tagaytay, Manila, Malacañang, Kamara ug Clark, Pampanga.
