DAVAO CITY – Nangandam na sab karon ang Philippine Coast Guard (PCG) Station Davao sa ipatuman nga inspeksiyon sa mga pasahero sa Santa Ana Pier isip kabahin sa Oplan Byaheng Ayos: Undas 2019.
Sumala pa kang Commodore Roy A Echeverria, Commander sa Coast Guard District Southeastern Mindanao nagatuyok na ang ilang mga personahe aron nga magpahigayon ug inspeksiyon sa mga nagkadaiyang pantalan ug terminals sa siyudad aron nga masiguro nga ang tanan nga mga PCG personnel ang andam sa pagdagsa sa mga pasahero ilabi na karon nga semestral break ug nagsingabot na sab ang Undas.
Samtang gikanayon sab ni Police Regional Office (PRO 11) Regional Director Police Brigadier General Filmore B. Escobal nga kinatibuk-ang 1,945 ka mga pulis ang ipakatag sa mga pribado ug pampublikong sementeryo ug sa mga vital installations sa Davao Region aron nga magpatuman og seguridad sa katawhan.
Gimandon sab niini ang tanan nga mga Station Commanders nga pahugtan pa ang security operations ug public safety plans atol sa paghinumdom sa kalag-kalag uban ang local government units ug law enforcement agencies dungan sa pagpatuman sa security measures.
Gitataw sab sa PRO 11 nga magpahimutang sila og Police Assistance Centers sa terminals, malls, beach resorts alang sa paspas nga pagresponde panahon nga adunay reklamo.
