Nag-courtesy call kagahapong adlawa sa buhatan ni Davao City Vice Mayor Baste Duterte ang pito ka mga estudyante gikan sa dakbayan sa Davao nga nakauli ug gold ingon man silver medals sa nagkadaiyang international math competitions sa milabay nga Agosto ug Setyembre ning kasamtangan nga tuig.
Sa gipahigayon nga Hong Kong International Mathematical Olympiad 2019 sa Hong Kong sa milabay nga Agosot 29 hangtud Setyembre 3, nakauli ug bulawan nga medalya sila si Franz Achilles Lindayag, anak ni engineer Francis ug Mides Marie Lindayag ug ang Grade 7 student gikan sa Philippine Science High School-Southern Mindanao Campus (PCHS-SMC).
Nakadaog sab sila ug silver medals sa South East Asia Math Olympiad sa Singapore ug Thailand International Math Olympiad sa Phuket, Thailand kaniadtong April 2019.
Ang Grade 10 student Clarissa Lois R. Dalian ug Grade 9 student Mary Grace Espino sa PCHS-SMC ingon man ang Grade 6 student Zuleika Lou R. Dalian ug Grade 2 pupil Mervin R. Dalian Jr. sa Holy Cross of Mintal Inc. ang nakasakmit ug silver medal sa Hong Kong International Mathematical Olympiad 2019, samtang si Daniella Claire Dumogho, Grade 3 pupil gikan Davao City Special School, ang nakauli ug bronze medal.
Nasayran nga ang mag-igsuon nga Dalian ang anak ni engineer Mervin M. Dalian ug Judie R. Dalian, samtang si Daniella Claire ang anak ni Reijde Lynne Dumogho.
Samtang si Mary Grace Espino, nga anak nila ni Jonathan ug Renelyn Espino, ang nakauli sab ug gold medal sa International Mathematics Competition 2019 nga gipahigayon sa Singapore sa milabay nga August 1 hangtud 4.
Samtang si Zeus Francesco Vitaly C. Lindayag sa Ateneo de Davao University, ang gihatagan ug Hong Kong China Merit Award ug nakauli ug Bronze Award sa Hong Kong International Mathematical Olympiad.
Gidayeg ni Vice Mayor Baste Duterte ug kahanas sa mga nahisgutan ug ilang gidala nga dungog alang sa dakbayan sa Davao.
