DAVAO CITY – Dili tubag sa nagka-taas nga ihap sa early o teenage pregnancy ang sugyot nga ibulag og classroom ang mga estudyanteng lalaki ug babaye.
Subay sa iyang personal nga panlantaw, gikanayon ni DepEd XI spokesperson Jenelito Dodong Atillo nga “binugo” (stupidity) ang nahisgutang sugyot gumikan kay magkita lamang gihapon ang mga estudyante paggawas sa tulunghaan – butang nga dili na ma-monitor ug dili mapugngan sa tulunghaan bisan na sa mga ginikanan.
Inay, gisugyot ni Atillo nga molusad ang kagamhanan ug kampanya alang sa mas pagpalig-on pa sa paghatag og edukasyon sa mga kabataan nga manukad mismo sa tagsa-tagsa ka mga pinuy-anan.
Gisaway usab ni Atillo ang kanunay na lamang nga pagbasol ngadto sa DepEd sa halos tanang mga problema may kalabutan sa mga estudyante sama na lamang sa pag-taas sa kaso sa dengue ug karon sa sayo nga pagka-mabdus sa mga babayeng estudyante.
Sa pikas bahin, nanawagan karon si Atillo sa mga grupong Lawig Bubai ug sa Talikala nga hatagan ang DepEd ug lig-ong mga ebidensiya isip suporta sa pahayag niini labot sa online prostitution nga gikalambigitan sa mga senior high school students sa mga public school sa dakbayan.
