Tanan nga mga local government units, ilabi na sa mga barangay latas sa probinsiya sa Davao Oriental ang gipahimangnoan nga mopahigayon ug intensified cleanup drive matag adlaw nga biyernes.
Sa usa ka hinabi, gikanayon ni Karen Lou Deloso, provincial information officer, nga nag-isyu sumala pa ug kamandoan si Governor Nelson Dayanghirang pinaagi sa usa ka executive order diin tumong niini nga makunhuran ug makontrola ang pagkatag sa lamok nga nagdala ug sakit nga dengue.
Dungan niini, gi-turn over sab ang duruha ka mga fog machines sa Public Health Office nga gamiton panahon nga adunay dengue outbreak ingon man usa ka spray sa matag 11 LGUs sa probinsiya.
Gi-awhag ni Dayanghirang ang publiko nga kinahanglan responsable kini sa pagpanglimpiyo sa ilang kaugalingon komunidad ug panimalay ilabi na sa mga areas nga breeding grounds sa dengue mosquitoes.
Gikanayon ni Provincial Health Officer, Dr. Herminigilda Nartates, nga aduna sumala pay 997 ka kaso sa dengue sa probinsiya diin upat ang natalang namatay sukad Enero hangtud na sa Setyembre ning kasamtangan nga tuig.
Gikanayong anaa sa 105 ka kaso ang natala sa bulan sa Hulyo ug 137 sa August apan miubos kini ug siyam sa bulan sa Setyembre.
Gidayeg sab ni Joeford Montejo Jr., Department of Health Regional Office administrative officer, ang Davao Oriental gumikan kay kini lamang ang probinsiya sa rehiyon nga nagmugna ug Dengue Task Force.
