DAVAO CITY – Nagpadayon karon ang gipahigayon nga satellite registration sa ahensiya sa Commission on election (Comelec) sa mga barangay ning siyudad ayha matapos ang deadline niini sa Setyembre 30 ning tuig kasamtangan.
Kagahapong adlawa, gibisita sa comelec ang Brgy. 5-A diin gatusan ang nakabenepisyo ug nakaparehistro.
Dakong tabang sab sumala pa ang maong lakang gumikan kay dili na kinahanglan pa nga moadto sa mga botante sa buhatan sa comelec aron nga magparehistro.
Una ng gibutyag ni Atty. Krisna Samantha Caballero, tigpamaba sa Comelec, nga sa kasamtangan padayon sila nga nakadawat ug hangyo nga mohimo sab ug satellite registration sa lain pa nga mga Barangay sa dakbayan.
Gani ang mga sakop sa kapulisan ang mihangyo sab sa comelec nga magpahigayon ug susama nga lakang alang kanila aron nga dili na sila malisdan sa pagparehistro.
