DAVAO CITY – Nanawagan si Police Regional Office (PRO) XI Regional Director Brig. Gen. Marcelo Morales sa inahan ni Judy Lou Palas nga mopatim-aw na ug ibalik ang kwarta sa mga nag-invest sa kompanya nga kanhi gi-trabahuan niini.
Gipagawas ni Morales ang nahisgutang pahayag human masuta nga ang inahan ni Palas ang kanhi nag-trabaho isip cashier ug agent sa PLC investment company, apan nagtago-tago na sulod sa halos duha ka bulan human nanirado ang maong kompanya.
Nagtuo si General Morales nga sa higayon nga ma-uli na ang kuwarta sa mga investor, posibling mahunong na ang sunod-sunod nga pagpatay sa Tagum City nga gikanayong may kalabutan sa investment scam.
Sa pikas bahin, mipadangat sa ilang dakong pahasubo ang Police Regional Office XI ngadto sa pamilya sa biktima nga si Judy Lou Palas.
Kahinumduman nga gipusil patay si Palas niadtong Septyembre 4 sa gabii sulod mismo sa pinoy-anan sa iyang iyaan sa Purok Dahlia, Brgy. Visayan Village, Tagum City.
Nasamdan usab sa maong pagpamusil ang ig-agaw niini nga si Marinelle Tajale, 15 anyos.
Narekober sa kapulisan ang 3 ka basiyo sa bala sa .45 kalibre nga pisitola.
Na-una nang nagtuo ang mga higala ni Palas nga posibling na-angin lamang ang biktima sa kasong gikalambigitan sa iyang inahan.
