DAVAO CITY – Kasong kalapasan sa RA 10531 kun National Electricity Administration Reform Act ingon man RA 10591 kun Comprehensive Firearms and Ammunitions Regulation Act ang iduso sa mga suspek nga nadakpan sa kapulisan human nga illegal kini nga nag-instalar ug kuryente sa konsumante nga naputlan sa Barangay Tagnanan Mabini bag-ohay pa lamang.
Kahinumduman nga una ng nagpaila ang mga suspek nga empleyado sa Davao del Norte Electric Cooperative (Daneco), ilalom sa Cooperative Development Authority (CDA).
Naila ang mga dinakpan nga sila si Breselo B. Veñares, 46, groundman; Ricky B. Peñas, 45, lineman; Rolando D. Manabat, 52, Task Force (TF) Daneco CDA; Rogelio A. Opao Sr., 56, TF Daneco CDA; Benjamin M. Tolibad, 63, TF Daneco CDA; Vernie P. Aurelio, 35, lineman; Bonifacio P. Mandawe, 28, lineman; Jimmy B. Magsanay, 40, TF Daneco CDA; Delfin Y. Tomaquin, 50, TF Daneco CDA; Manny A. Morata, 37, lineman; ug Gilmor M. Navarra, 31, meter inspector.
Gikanayong illegal sumala pa nga ibalik sa mga nahisgutan ang kuryente sa konsumante nga naputlan ug linya.
Dali gilayon nga miresponde ang mga sakop sa Mabini Municipal Police Station human nga positibo ang ilang nadawat nga operasyon sa illegal nga binuhatan sa mga dinakpan. Gawas sa nagkadaiyang gamit, narekober sab sa usa sa mga suspetsado ang usa ka kalibre .45 nga pistola, duha ka magazines sa nahisgutang armas, walo ka mga buhing bala nga gituohang gikan sa kalibre .45 nga pistola nga nakuha sa posisyon ni Rogelio A. Opao Sr. Wala sumala pay mapakita nga dokumento ang dinakpan sa iyang armas nga gihuptan. Susama karon nga gipangpaslak sa presohan ang mga suspetsado.
