DAVAO CITY – Patay ang asawa ug kumpare human nga gitigbas sa mister sa dihang nasakpan ang duruha nga nagtagay sa lawasnong kalipay sulod sa payag sa kumpare.
Nahitabo ang insidente sa Brgy. Gupitan, Kapalong, Davao del Norte.
Nasayran gikan sa Kapalong Police station nga nagkasinabot matud pa ang magkumpare nga nailhang sila alyas Berting, 25 anyos, ug alyas Jerico, 25 anyos sab, nga manguha og kamote sa bukid sa dapit ni Berting.
Sa dihang nakaabot na sa balay sa kumpare sila Alyas Jerico ug ang asawa niini nga 25 anyos sab nga si alyas Jean-jean kauban ang ilang anak, nahinumduman ni Jerico nga nahabilin sa ilang panimalay ang bukag nga mao untay butngan sa ilang makuha nga kamote.
Gumikan niini, miuli ug gibalikan ni Jerico ang nabilin niini nga bukag ug gibilin una niini sa balay sa iyang kumpare nga si Berting ang asawa niini ug ang ilang anak.
Human nga nakabalik na ang mister, natingala na lamang kini nga nakitang nag-inusarang nagdula ang ilang anak sa silong sa balay ug wala ang iyang misis ug ang iyang kumpare.
Misaka sa payag ang mister ug didto iyang nasaksihan ang pagpangluib sa iyang misis kauban ang iyang kumpare.
Tungod sa hilabihang kasuko, gitigbas niini ang duha human nga naabtan niya nga nagtagay sa lawasnong kalipay.
Nagrabehan si Berting sa pagpanigbas ni Jerico samtang si Jean-jean nga bisan samdan na, nakahimo pa gihapon sa pagdagan sa silong sa maong balay ug didto na kini nakabsan sa kinabuhi.
Sa karon, padayun pang ginapangita ang suspek nga dali gilayon nga miikyas dala ang ilang anak.
