Gipasiugda ni Defense Secretary Gilberto Teodoro Jr. ang panginahanglan sa Pilipinas og “expeditionary navy” aron mapanalipdan ang mga barko ug Filipino seafarers sa high seas samtang palig-onon ang maritime industry sa nasod.
Matud ni Teodoro atol sa 3rd Balangay Forum sa Makati City, gikinahanglan ang maong naval capability aron maprotektahan ang mga Filipino seafarers ug barko kauban ang mga nasod nga parehas og baroganan sa maritime security.
Gipasabot nga ang “expeditionary navy” usa ka naval force nga makahimo og operasyon gawas sa kaugalingong territorial waters alang sa maritime security.
Iyang gipunting nga ang pagpalig-on sa shipping capacity dili lamang alang sa ginansiya, kondili importante usab isip reserve capacity panahon sa krisis, sama sa mga disruption sa supply chains atol sa COVID-19 pandemic.
Dugang pa, giila ni Teodoro ang kamahinungdanon sa maritime domain sa Pilipinas isip archipelagic country, ilabina sa food production, ekonomiya ug supply chains.
Sumala niya, ang pagpalambo sa “blue economy” ug maritime resources nalambigit usab sa pagpalig-on sa military capabilities sa Pilipinas.
